سڑک حادثہ میں شہر کے دو نوجوان علماء جاں بحق

جلسہ میلادالنبیؐ میں شرکت کے بعد واپسی کے دوران پیش آئے سڑک حادثہ میں شہر کے دو نوجوان جاں بحق اور دیگر چار شدید زخمی ہوگئے ۔ یہ حادثہ ضلع رنگاریڈی کے منے گوڑہ میں آج صبح اس وقت پیش آیا جب ان کی تیز رفتار کار توازن کھوکر اُلٹ گئی ۔ اس حادثہ میں قاضی پورہ کے رہنے والے پچیس سالہ مولانا محبوب قادری عرف محبوب پاشاہ اور تالاب کٹہ کے رہنے والے پچیس سالہ حافظ فہیم الدین جاں بحق ہوگئے ۔ یہ افراد کرناٹک کے چنچولی



میں جلسہ میلادالنبیؐ سے خطاب کے بعد کار میں واپس ہورہے تھے ۔ زخمیوں میں تین کی حالت تشویشناک بتائی جاتی ہے ۔ اطلاع ملتے ہی مجلس کے معتمد عمومی و رکن اسمبلی چارمینار احمد پاشاہ قادری وقارآباد کے سرکاری دواخانہ پہونچ گئے جہاں پر ان دونوں مہلوک نوجوانوں کا پوسٹ مارٹم کیا گیا ۔ اس واقعہ کے بعد متعلقہ محلہ جات میں غم کی لہر دوڑ گئی ۔ آج بعد نماز عشاء مرحومین کی نماز جنازہ ادا کی جائے گی اور تدفین قاضی پورہ میں عمل میں آئے گی